S’iscola
Unu grustiu ’e pizzinnos animosos
sempre in chirca ’e facher balentia ;
conchinigheddos, brundos, mucconosos ;
robas de furca , tottu simpatia.
Mamas cuntentas, babbos premurosos
ponen sas alas a sa fantasia…
E si los pessan mannos, birtudosos,
riccos de brama, chintos d’alligria.
Dego, die pro die, chin affettu
mi nche los ponzo in s’anima, in su coro,
e nde prango sas penas in segretu.
E gai, un’accasazu, unu cazzottu:
tottu a misturu! Ma pro more issoro
sico a gherrare in mesu a s’abbolottu.
(Franceschino Satta)